【Emily】謝偉銓標白髮 話無關監警忙
[2019.10.26] 發表
【明報專訊】立法會上星期復會，建築、測量、都市規劃及園境界議員謝偉銓(Tony)經過幾個月暑假，頭髮由黑變白(圖)。64歲嘅Tony身兼監警會副主席，呢排身負重任，因為監警會成立咗小組，處理反修例風暴以來對警方嘅投訴。頭髮係咪因為咁樣白得快咗？Tony話監警會工作的確因為審視範圍擴大，而壓力大咗，不過認為同佢啲頭髮白得快咗無關係。
Tony笑住話好多朋友都關心佢啲頭髮做咩突然白咗咁多，佢話自己日日見住唔多覺，太太就話因為佢真係老咗，Tony都認同。Tony話連助手都叫佢快啲染髮，擔心業界覺得佢有老態，雖然佢覺得無咩問題，但遲啲都會染番黑啲頭髮。Tony透露，過去5個月先要染一次髮，𠵱家睇嚟3個月就要染一次。
更多港聞
相關新聞
