【Emily】鬍鬚曾出技術文 估林鄭無興趣
[2019.07.22] 發表
【明報專訊】前財政司長曾俊華噚日喺灣仔書展出席新書《重劍2.5》嘅發佈會，新書其中一個重點係「面對挫折，走向成功」。會唔會將呢本書，推薦畀最近施政備受爭議嘅特首林鄭月娥？曾俊華話想推薦畀全港市民，但話本書比較技術性，無5至7年劍擊經驗都唔會睇得明，又話「我覺得佢(特首)對劍擊無興趣」。至於近日嘅政治爭議，曾俊華對Emily所有有關政府施政嘅問題都唔肯答，話關於政府嘅事就問番政府，「我遠離政治好遠啦」。
唔答施政問題 「遠離政治好遠」
曾俊華6月12號夜晚喺facebook上載短片，呼籲大家唔好畀傷心同害怕嘅情緒埋沒理智，唔好做出傷害香港、自己同身邊人嘅決定。事隔一個月，有市民喺各區自發舉行唔同示威活動，曾俊華話現時想法同當時一樣，又話好多時都會見到連儂牆，成日喺金鐘都會經過，咁有無駐足觀看？佢就話自己做過咩都唔會講。至於有咩勸勉說話想對年輕人講，佢就話「大家努力啦」。
今次呢本新書，曾俊華話自己唔係作者，只係負責將相關劍擊技術同原著作者睇法翻譯修訂，話希望讀者可以理解到佢舊時教練所講，喺比賽中弱者係可以靠策略，將強者最優勢嘅水平拉到同自己一樣。
更多港聞
相關新聞
