機會來了 港人可為系外行星命名
[2019.06.07] 發表
【明報專訊】近年天文學家發現咗太陽系外有唔少好似地球咁嘅岩石行星，國際認可機構、負責命名各種星體嘅國際天文聯會(IAU)為紀念成立百周年，將舉行行星命名活動，讓百多個成員國家或地區各自可為一顆系外行星及其母體恒星命名。
IAU分配畀香港嘅系外行星系統位於寶瓶座，雖然距離太陽系427光年，但身處地球可以透過小型望遠鏡睇到。聯會嘅香港天文推廣聯絡員梁淦章話，IAU對上一次於2015年為19粒系外行星辦命名活動，但嗰次係全球投票，今次每個成員國家或地區都獲分配一個系外行星系統，即係港人首次有機會為系外行星命名。聯會蒐集提名後會篩選10至20個畀市民投票，選出三強畀IAU審批；佢仲話提名可用中文，但都有限制，如唔可以用政治人物名稱。
更多港聞
相關新聞
