葉sir開檔寫揮春 與葉劉互贈心想事成
[2019.02.02] 發表
【明報專訊】教育界立法會議員葉建源寫得一手好字，近年嘅農曆新年前都有喺立法會開檔幫議員同事、立法會職員同傳媒寫揮春。佢噚日開檔期間，新民黨主席葉劉淑儀經過，笑言「你咁醒喺度開檔，要收租㗎喎。以為你寫『平反六四』𠻹」。葉sir寫咗張「心想事成」畀葉太，葉太亦即席揮毫回贈「心想事成」畀葉sir。
葉太轉送律政司政務專員
葉太之後喺facebook度話「心念一轉」，將葉sir寫畀佢嘅「心想事成」揮春，轉送律政司政務專員蕭如彬，話希望祝佢哋新一年事事順利、心想事成。
葉太日前話「野豬唔守交通規則」，有日揸車爭啲撞到野豬。噚日有圍觀者建議葉sir寫張「路路暢通」嘅揮春畀葉太，咁就唔使再撞到野豬；葉太回應話，「無用㗎，要衝出嚟就衝出嚟」。
有人叫寫路路暢通畀葉太防野豬
另外，葉sir噚日都有寫揮春贈一贈教育局長楊潤雄，祝佢「家肥屋潤」。議員都各有願望，好似民主黨尹兆堅就要求葉sir寫張「安居樂業」嘅揮春，希望香港市民都安居樂業。葉sir話收過最特別嘅要求，係寫揮春畀動物，好似「貓狗平安」咁。
更多港聞
相關新聞
