1985-86換證 有人影6次相先收貨

全港市民分階段換領新智能身分證，1985年或1986年出生嘅人噚日開始換證，早上已經有唔少人去到灣仔嘅換證中心辦理手續。全港一共有9間換證中心。（黃志東攝）

市民喺換證中心拎籌後，可以喺自助登記服務站插入現時嘅智能身分證，做指紋核對，輸入同核對申請資料，再列印及領取填妥嘅表格，去等候區，跟住入境處會派人幫手影相，再辦理其他手續。（黃志東攝）

市民分階段換領新智能身分證，入境處搵咗藝人薛家燕（左）及張智霖（右）擔任宣傳大使，新證（圖中為樣本道具）上嘅相片尺寸比舊證大三分之一。圖中嘅係助理入境處長（個人證件）陳天賜。（黃志東攝）

【明報專訊】全港市民換領身分證計劃舊年12月27日展開，1985年至1986年出生市民噚日起率先可以辦理換證手續，期限直至3月30日。大家可以到9間智能身分證換領中心辦手續，噚日唔少人話過程順利，10至20分鐘就完成，有啲人就好貪靚，影咗5至6次身分證相先至滿意。

立法會議員、官員等早前已可率先換證，議會陣線立法會議員毛孟靜(Miss Mo)就已拎咗新證，仲喺facebook上載證件一小角嘅相，佢話早前去換證時自稱「中國香港籍」，入境處職員就話「抱歉沒有這一項選擇」。Miss Mo嘅證上寫有「AZ」，佢好奇一問，原來A代表居留權，Z代表香港出生。

入境處為咗關愛老友記，市民可以帶最多兩個65歲或以上嘅親友去換證。助理入境處長(個人證件)陳天賜話截至1月19日已處理咗3.6萬宗申請換證個案。連同年滿11歲同18歲、因遺失或損壞而需要補領身分證、更改身分證資料等各類人，入境處舊年11月26日至本月19日就簽發咗66,648張新智能身分證。