鄭松泰願調位 陳凱欣立會同建制一齊坐
[2018.11.28] 發表
【明報專訊】喺九龍西立法會補選當選嘅陳凱欣，今日會喺立法會大會上宣誓就任；佢喺補選得到建制派議員鼎力支持，入到議會後，不論係辦事處定大會嘅座位都同建制派相鄰。民建聯主席李慧琼噚日喺電台節目話民建聯歡迎陳凱欣加入，陳話好感謝對方支持，但重申暫時唔會加入政黨。
民記歡迎加入 陳：暫唔入政黨
喺立法會會議廳嘅座位，原本陳凱欣要坐喺熱血公民鄭松泰嘅右手邊，同其他建制派議員分開坐，但佢噚日同Emily講，鄭好好咁願意向右移過一個位，所以佢可以坐喺體育、演藝、文化及出版界馬逢國隔籬。陳凱欣話呢個座位無咁尷尬，如果第日鄭松泰同民主派有咩行動都唔使隔住佢。鄭松泰就喺facebook解釋點解會轉位：「我唔轉位，就會被兩個建制派夾住，溶在一起；我轉位，主要係因為唔想下下繞過人出入。」
至於開內會、財會嘅會議室1，陳凱欣就被安排坐喺人民力量陳志全隔籬，唔可以同建制派一齊坐。
辦公室方面，陳凱欣揀好咗喺立法會6樓嘅辦公室，與民建聯鄭泳舜同獨立嘅何君堯為鄰，6樓亦係民建聯議辦所在地，不過由於間房仲要整番啲間隔，臨時office係1019室，即係前議員、社民連梁國雄嘅辦事處。
更多港聞
【明報專訊】政務司長張建宗噚日率領多個局長同副局長，首次坐高鐵去內地官式訪問，張建宗同政制及內地事務局長聶德權都唔放過機會大讚高鐵有幾好。張...
詳情
【明報專訊】香港人鍾意去旅行，唔少人把握聖誕檔期飛番轉。旅遊業議會話，除咗日韓溫泉、滑雪團之外，今年有個12月初出發嘅25天南極、南美旅行團...
詳情
相關新聞
