【明報專訊】29歲無綫新晉藝人余德丞上月8日晚參加足球賽時感不適後昏迷，被送往瑪麗醫院深切治療部搶救，情况一度危殆，圈中好友及關心他的人為他集氣，祝福他。其後他的情况逐漸好轉，蘇醒及轉往心臟科病房觀察。他曾開腔透露事發時心臟曾停了一段長時間，可以醒番，覺得好好彩。經過約一個月的治療，昨日他在社交平台報喜說已出院，回家最好不過，透露暫時不能做運動，明白生命無take 2，會好好珍惜，待休養後會重新出發。

剛於9月2日度過29歲生日的余德丞，昨日在社交平台上載一張跑步的舊照，還有好友給他的打氣卡、T恤，以及生日蛋糕。他說已出院回家休養，感謝醫護人員及家人的照顧，以及大家的關心。

暫時不能做運動

余德丞撰文透露出院心情﹕「我出院啦！感謝瑪麗醫院嘅醫生同護士們，見住你哋早更完又夜更，又一大早巡房，又每日24小時留意住我嘅病情，真係辛苦你哋！感謝我嘅屋企人，每日擔心我病情嘅變化，又驚我唔知有什麼需要，仲要每日頻頻撲撲幫我準備三餐。感謝我公司，我經理人同一班好同事，成日擔心我會鑽牛角尖亂咁諗，一得閒就開解我。感謝我嘅朋友，知我一個人悶，一有空檔就嚟陪我傾偈，仲要買埋生果糖水畀我食。感謝每一位關心我嘅你哋同支持我嘅fans，喺唔同嘅社交平台都見到有好多問候我嘅短訊。雖然我未能夠一一回覆，不過我絕對感受到你哋嘅心意。

不過坦白講，原來連續咁多日面對住一樣嘅三面牆，加埋打唔開嘅窗，感覺真係好難受！所以我都希望今次之後，我嘅身體會生生性性，爭一口氣，唔好再令大家擔心。醫生話短期之內唔可以做運動住，相信都會係我最唔習慣嘅。生命無take 2，今次咁好彩有多一次機會，我一定會好好珍惜。畀啲時間，等我休養多一陣，好快就會重新出發#我只想身體健康 #回家最好不過 #第二生命#comebackstronger#happybirthdaytome #hk #hkig #instadaily #yuts」。

文﹕娛樂組