【明報專訊】前特首梁振英(CY)早前向理工大學應用社會科學系助理教授鍾劍華發出律師信，控告鍾誹謗。「守護公義基金」噚日宣布，會開始為鍾劍華籌款，等佢可以作司法抗辯。 守護公義基金發言人鄭宇碩話，鍾劍華已經正式向基金求助，籌募抗辯經費，但由於鍾同時擔任基金信託人，為咗避免利益衝突，鍾劍華決定退出基金。工黨何秀蘭應邀加入成為基金信託人。 原任信託人 現退出免利益衝突 守護公義基金成立至今，已經籌得超過1200萬元，扣除「DQ案」原訟庭律師費，以及佔中9人案部分律師費用後，基金仲有約636萬元存款。基金希望未來嘅籌款額可以達到1000萬元，以便應付多件大案，包括「DQ案」嘅政府律師費同上訴費用、佔中9人案、鍾劍華案嘅律師費，以至未來其他重大政治檢控所需嘅官司費。 除咗鍾劍華，另一名學者、港大法律學院首席講師張達明周日晚自爆，喺5月時因評論前特首梁振英(CY)收取UGL報酬事件，收到CY兩封律師信，並喺facebook寫千字文講述事件。 佢噚日話估唔到短短12個鐘內已有逾40萬人睇過、2700人分享有關帖文，並應讀者要求，公開兩封律師信內容。 Emily睇CY fb，噚日未見有出新post回應張達明，只曾發文繼續狙擊香港外國記者會。
|
| |
| |
;){kind=small}
