【明報專訊】特首林鄭月娥噚日與立法會「六散人」見面，聽吓呢班無政黨嘅建制派議員就施政報告嘅意見。保險界陳健波又有創意提議，要求增加高級公務員嘅政治磨練，方法之一係要高官去香港電台或其他傳媒機構實習，等佢哋醒少少，知道市民諗緊乜嘢。 波哥向林太提出13項建議，包括涉及業界保險問題，亦有要求加快填海造地等，最後一項係「增加高級公務員的政治磨練」。波哥都唔止一次話有部分公務員表現唔好，如去財委會回答議員提問做得唔好，搞到項目撥款難以通過。波哥同Emily講，應安排高官去立法會或區議會秘書處學習，亦可以去港台及傳媒機構實習，等佢哋有機會知道其實市民點樣睇政府。佢話唔少人讚公務員高效及清廉，但講笑話如果高官去傳媒機構做吓，會發現記者工作效率可能快一千倍喎！波哥咁講，唔知係想讚Emily定係曲線批評一啲官員呢？
|
| |
| |
