市民書展快閃抗議「三中商」
[2018.07.23] 發表
【明報專訊】港台《鏗鏘集》早前報道，中聯辦透過內地公司「廣東新文化事業發展」，間接控制三聯、中華、商務(三中商)三大書局和出版社。書展正喺會展舉行，有市民噚日自發去到三聯同商務印書館嘅攤位「快閃」示威，呼籲市民罷買三中商，質疑三中商喺中聯辦控制下，會有政治審查，令一啲敏感書籍唔可以上架。
Emily問過其中一名參與示威嘅市民Abraham ，佢話行動係朋友自發，當時大家手持政治敏感嘅書喺攤位前讀，希望藉行動表達三中商同中聯辦嘅關係，又呼籲市民去小書店買書，支持一啲喺三中商上唔到架嘅書籍。Abraham話，希望民間可以舉辦多啲小型書展，讓市民了解同接觸更多喺大型書店無法上架嘅書；而「快閃」示威時並無受到保安騷擾。
貿發局發言人回覆，無收到參展商或市民就上述事件投訴。發言人強調大會首要任務係維持秩序，保障公眾安全，期望公眾入場時保持良好秩序，並依從工作人員指示進場參觀。發言人話，根據展覽會規則，如有任何參觀者、參展商或其代理，對展覽會、其他參展商或參觀者造成騷擾或不便，主辦機構有權禁止佢哋入場。
更多港聞
【明報專訊】政府會喺8月4號取消旺角西洋菜南街行人專用區，意味29號將會係旺角最後一次行人專用區。九龍西立法會議員毛孟靜過去幾年不時喺旺角行...
詳情
【明報專訊】國畫畀人感覺古老啲，有無諗過年輕人、甚至小學生，畫國畫一樣得？由唐英年任會長嘅江蘇社團總會，早前主辦首屆「蘇韻流芳」青少年國畫比...
詳情
相關新聞
