逾萬高清打印圖 文化博物館現數碼敦煌
【明報專訊】心思思想去敦煌睇石窟,唔使親自飛過去,去香港文化博物館就有得睇!今日起到10月22日,文化博物館同敦煌研究院合辦「數碼敦煌——天上人間的故事」展覽,有逾100件展品同多媒體裝置,除咗一級文物外,當中最特別會透過數碼化方式,例如虛擬實境同影像融合技術等呈現敦煌文物。
戴VR漫遊洞窟 設電玩遊戲
展覽會展出西魏時期具代表性嘅莫高窟285窟,為重現呢個石窟,先要喺敦煌實地高清拍攝,然後喺展館拼貼過萬張高清打印圖片。文化博物館署理總館長林國輝話,市民入到去,就等於去咗敦煌睇到真嘅一樣!洞窟嘅壁畫,有中國雷神電神、希臘嘅日神月神同印度嘅象頭神等,好明顯睇到中西文化嘅交流。館中莫高窟第254窟,就以影像融合同投影技術,將原有顏色同解說投影?洞窟,林國輝話就好似洞窟自己會講故事咁。
明明去到展館第45窟嘅位置,點解見唔到洞窟嘅?原來因為係「虛擬洞窟」,去到記得要戴上館方提供嘅眼鏡,先可以虛擬漫游第45窟,入面仲有壁畫解讀!
館方仲搵咗知專設計學院學生,想佢?幫手喺展館加設互動項目,順便睇?年輕人點解讀佛經內容。林國輝話學生提供咗好多方案,想法前衛,當中為第196窟《勞度叉鬥聖變》設計咗有教育意義嘅電玩遊戲,有勞度叉同舍利弗大鬥嘅6個回合,如果其中一個回合失敗,就會被勸說再去睇多次《勞度叉鬥聖變》,了解多啲先再嚟玩。林國輝話希望大家唔好覺得文物好悶,其實內容好吸引。林國輝又話,數碼化方法可以令石窟資料永久保存,將敦煌嘅美帶到全世界,而今次用咗1年半時間籌備,希望可吸引到20萬人入場參觀。