【明報專訊】澳門立法會議員蘇嘉豪去年12月因為被控「加重違令罪」，遭立法會投票通過暫時中止職務，當地法院上星期確認案件判決，蘇嘉豪亦已繳納罰款，立法會噚日通知蘇嘉豪，話已經收到法院確定文件，事隔7個月後，佢終於正式恢復議員職務。蘇嘉豪噚日喺facebook直播從議員辦公室行到委員會會議室，參與復職後第一個會議，唔少網民都留言祝賀佢復職，並為佢打氣。

蘇嘉豪亦喺fb發文，話唔會忘記自己同選民被剝奪政治權利嘅遺憾，形容復職「應該讓人鬆一口氣，但這不是光榮復職，也不值得太高興」，因為喺澳門行使公民權利同自由，正面臨前所未見嘅壓力，佢強調仍須眾人百般合力，先可以堅持走好監察施政嘅道路。