【明報專訊】新界鄉議局噚日舉行慶祝香港回歸21周年酒會，特首林鄭月娥、政務司長張建宗、中聯辦副主任陳冬等應邀出席。鄉議局主席劉業強就當住一班高官面前，批評政府忽略鄉郊民眾基本需要，有偏遠鄉村缺乏水電、交通配套等基礎建設，加上有人挑戰新界原居民受《基本法》第40條保障嘅傳統權益，搞到「新界人有六月飛霜嘅恐懼，感到沮喪同失望」，希望政府履行基本法嘅憲制責任，保護原居民權益。 「鄉郊缺基建 合法權益被挑戰」 劉業強致辭時話，香港喺發展過程入面，遇到唔少困難，例如有一小撮亂港分子影響社會治安，引起市民對一國兩制誤解，新界原居民嘅合法權益受到嚴峻挑戰，喺慶祝香港回歸大日子，新界原居民畀一片悲情籠罩，期望特區政府能撥亂反正，令明年新界原居民可以「人面桃花相映紅」。有彈亦都有讚，劉業強話香港面對住房、交通、人口老化問題，以林鄭月娥為首嘅特區政府已積極尋求解決方法，與社會各階層有良性同有效?互動。 林鄭聽到劉業強咁講，表情未有特別變化，之後同劉業強握手，事後亦無回應「六月飛霜」論。唔知聽完劉主席咁講，林鄭會唔會認真為鄉郊民眾解決問題，令佢哋消消氣呢？
|
| |
| |
;){kind=small}
