【明報專訊】民主黨前主席劉慧卿噚日主持網台節目《議會內外》，搵咗民協馮檢基做訪問，縱使喺卿姐窮追猛打下，阿基對於會唔會退黨、會唔會參加下場九龍西立法會補選，都無具體回應。阿基不斷強調「我𠵱家仲係民協中常委」，但談及退黨問題時，佢講咗句「每個人都有機會入有機會退」。由於阿基答問題時好扭擰，搞到卿姐都火滾。

阿基花咗唔少時間同卿姐講年初發生九龍西補選時嘅「屈基」事件，講部分民主派人士點樣逼佢退出唔做「Plan B」。阿基會喺即將出版嘅新書詳細講出當中過程。

卿姐教闢謠：答句唔係就無咗

最近政圈傳出阿基退黨嘅傳聞，但佢一直都無正面回應，當卿姐問佢係咪會退黨時，阿基繼續扭擰，話𠵱家傳聞太多，佢好難日日回應，卿姐發火反駁佢「唔係咪唔係囉」，話傳聞嘅嘢，只要答一句唔係，就會無咗。卿姐質疑「咁即係有機會退啦」，阿基就講咗句「每個人都有機會入有機會退」。

至於阿基係唔係永續參選，阿基就話忙緊寫書，「𠵱家唔考慮(參選)」，卿姐就鬧阿基答得「咁化學」㗎，話應該明確講考慮定唔考慮，質問阿基係咪寫完書就會考慮，阿基就只係重申𠵱家唔考慮。