【明報專訊】《選擇》月刊第500期噚日出版，又係時候回味舊時，消委會仲搵咗3個小學生做發言人，佢哋未睇過𠵱家嘅《選擇》，但就好熟舊月刊。打番開1985年100期嘅《選擇》，當年有一啲專欄，例如係「青少年專欄」，教大家剪去長褲褲腳變短褲、恤衫剪去衫領變圓領，提醒大家要善用資源。

佢哋仲話，第100期內文只得雙色，揭頁由左向右，同𠵱家好唔同㗎。其實《選擇》每個月風雨不改開記者會，Emily聽過有人用月事嚟形容呢個每月一次嘅聚會，咁啱今期就真係講月事，仲有「牛下女車神」李慧詩拍片，佢話作為單車選手，講求最貼身、最舒服嘅裝束，仲叫人去睇消委會嘅衛生巾測試，「咪幾時都好似我咁，來去如風，自由自在囉！」

另外，《選擇》facebook專頁搞緊遊戲，只要跟足要求同答啱答案，就有機會獲得環保隨身木餐具、全棉潔膚巾同埋膠餐墊套裝，獎品500份，先玩先得，送完即止。