【明報專訊】香港眾志噚晚舉行兩周年黨慶，筵開逾20席。眾志多個領軍人物喺去年先後入獄，新任主席林朗彥同前主席羅冠聰喺晚宴上分享獄中經歷，兩人都笑住話自己嘅「字頭」係「塘福(監獄)」。阿聰仲講漏嘴，話喺獄中「無聊得濟」嘅時候，會睇民主黨立法會議員鄺俊宇寫嘅愛情小說，唔少囚友亦都有睇咁話。

眾志喺過去一年經歷羅冠聰被褫奪立法會議席、多個領軍人物相繼入獄，周庭又被取消參選立法會補選嘅資格。眾志?晚宴上話，唔會再以政黨自居，將會轉型，告別議會路線，專注民間社會，表明會全面迎戰《基本法》23條立法。

眾志黨慶只邀請民主派同公民社會組織代表，冇邀請任何建制派。佔中發起人戴耀廷、青年新政梁頌恆、社民連梁國雄、公民黨主席梁家傑、工黨主席郭永健、民主黨副主席羅健熙，同埋多個泛民立法會議員，包括鄺俊宇、楊岳橋、邵家臻、毛孟靜和譚文豪等。區諾軒唔喺香港，噚晚冇現身。

繼上年惡搞民主黨黨慶時刊登嘅領展廣告，今年眾志繼續「抽民主黨水」，模仿民主黨狙擊梁振英UGL事件嘅「天下為公」宣傳風格，喺黨慶場刊最後一頁印上「天下衛許」嘅黑白相片，明言在困難時刻要「站在一起」，保衛民主黨許智峯。