宣傳買大送細 「30g可以帶上機」 髮gel品牌靚抽馬逢國

宣傳買大送細「30g可以帶上機」髮gel品牌靚抽馬逢國

[2018.05.26] 發表

【明報專訊】立法會體育、演藝、文化及出版界議員馬逢國，之前帶超出規定容量嘅Gatsby牌定型啫喱膏登機事件成為熱話，呢個品牌噚日喺facebook疑似抽水宣傳，不點名話「去旅行都想帶支定型啫喱膏gel番個靚頭，但擔心帶住太大支gel唔方便？」，再話買佢哋嘅定型啫喱膏，就會附送一支30克輕便裝，「細細支咁方便，想帶去邊都得」、「30g可以帶上飛機」咁話。

品牌噚日下晝3點幾貼文，唔夠6個鐘已經吸到逾8000個讚好同「哈哈」。馬逢國喺事件中被指拋出立法會議員身分，令違規物品都可以帶上機，有網民就話，有咗呢支30克髮gel，「唔洗識人都可以帶上飛機」。

另外，香港空勤人員總工會噚日發聲明，強烈譴責馬逢國，批評佢作為公職人員利用地位同人脈關係，向保安人員施壓令自己得到方便，事件「再次突顯權貴利用個人公權力挑戰機場保安人員的專業，肆意謀求自身方便及利益」，強調應以安全優先，唔可以因為權貴壓力而妥協。

本身為民航機師嘅公民黨議員譚文豪話會繼續狙擊，打算喺下周五(6月1日)內務委員會尋求內會同意，喺大會提出休會待續議案，討論馬逢國事件，佢批評近年不時有公職人員「自恃身分尊貴」向機場職員施壓，不但影響安全，仲打擊國際社會對香港邊境保安信心，但佢承認喺建制派護航下建議唔會通過。

更多港聞