信和置業副主席黃永光早前獲委任做新界太平紳士，根據《鄉議局條例》，佢都自然成為鄉議局嘅當然委員同當然執行委員。佢噚日首次出席鄉議局例會，帶咗個蛋糕同一班鄉議局嘅委員打招呼，會後讚一班委員好親切、坦誠，會議效率仲相當高，大家好齊心以新界權益出發。

佢話其實自己以往都有參與新界發展，例如大澳舊警署活化，亦有屯門黃金海岸嘅住宅、酒店同商場項目。佢話自己對新界嘅了解冇鄉議局入面班「uncle」咁清楚，雖然自己做地產，但都希望項目可以同社區接軌，強調信和唔止係起樓，仲希望同當區居民有互動，幫番當區朋友。

講到香港土地房屋供應問題，佢話自己同信和都非常支持香港政府解決房屋問題，而好多香港人都負擔唔到私樓，生活環境差，子女喺板間房大，對社會唔好。佢話每兩三個月都會去深水埗等區探訪基層，帶月餅去探訪幫到嘅只係好皮毛，認為佢哋需要嘅係一個「real home」。

黃永光提到，新加坡私人樓宇同公營房屋嘅比例係2比8，信和仍然都做到地產生意，而香港嘅就係6比4，佢話留意到社會有聲音希望提高香港公營房屋嘅比例。