【明報專訊】公民黨主席梁家傑及黨魁楊岳橋近日孖咇訪問美國，喺美國時間星期二兩人由紐約去到華盛頓，同署理助理國務卿(亞太事務)董雲裳、民主黨眾議院領袖佩洛西、眾議院外交事務委員會主席Ed Royce及亞太小組委員會主席Ted Yoho會面，兩人亦有分別喺facebook交代會面情况，其中楊岳橋形容，會上向佢哋介紹一國兩制喺香港「沉淪」，亦有游說佢哋為香港說項，等香港可以喺中美貿易戰中全身而退。

兩人又喺facebook上載短片匯報行程，傑哥話有向美方人員簡介香港一國兩制實踐情况、人權情况，講吓普選有無進展，佢話講到一國兩制發展，提及「中共點樣大力干預事務」時，對方主動提及高鐵「一地兩檢喺香港行內地法律吖嘛」，傑哥話原來對方都幾清楚。兩人預告，之後會拜訪美國律師協會、美國國會及行政當局中國委員會成員，亦會接受美國之音訪問。