【明報專訊】𠵱家好多嘢都電子化，書籍都唔例外，香港出版學會連續第三年做「香港全民閱讀調查」，就發現有三成人過去一年無睇過實體書。 香港出版學會今年訪問咗2063人，發現有七成受訪者過去一年睇過印刷書籍，即係有三成人無睇實體書。有睇書嘅人當中，以中位數嚟計，每星期閱讀時間3個鐘，每個月睇兩本書，每年買5本書，情况喺呢3年間大致維持穩定。而無睇書嘅人當中，接近四成係因為「無時間或工作太忙」，差唔多三成人認為「網上閱讀已經夠」，比例比起2017年高咗7.6個百分點。 另外，有約64%受訪者喺過去一年有上網閱讀，主要係「睇新聞或新聞評論」同「上社交媒體閱讀貼文」，亦有大約一成人會睇電子書。 如果一本書同時有印刷本同電子版本，約有55%受訪者會選擇睇印刷本，雖然仍佔多數，但比例就由3年前嘅68%回落。
|
| |
| |
