【明報專訊】被DQ嘅姚松炎早前以房產發展研究中心創辦人身分，就太古城一帶提出新規劃建議，包括喺東區走廊近太古海濱一段馬路上，蓋建露天平台作行人專用區同休憩地方，並改劃鰂魚涌公園起合作社房屋，點知建議令個別泛民人士同建制政黨不滿。繼民主黨太古城區議員趙家賢帶頭鬧姚嘅建議天馬行空、令居民感到厭惡，新民黨及民建聯東區支部都唔執輸，噚日分別發聲明批評姚教授嘅建議。 新民黨指姚教授嘅建議形同「插針建屋」，有關地方係毗鄰太古城居民嘅重要活動空間同社區設施，批評建議嚴重破壞太古城嘅社區完整性同環境，仲話個建議同建設宜居城市嘅方針背道而馳。 民建聯東區支部同趙家賢持同一立場，批評姚教授嘅建議係「天馬行空式」規劃，嚴重影響當區居民生活同環境，該黨東區支部明言對建議極度遺憾，強烈反對，指喺休憩用地興建高樓有可能造成屏風效應，拉低整個社區嘅環境質素。
|
| |
| |
