【明報專訊】自由黨鍾國斌(Felix)喺剛剛嘅4日公眾假期「獨遊」緬甸，佢話帶住3個任務，包括睇吓當地工業園起工廠進度、引入緬甸外傭安排，以及應邀出席當地政府準備建設「新仰光城」嘅一個典禮。

料緬傭最快下半年引入

Felix呢幾日喺facebook分享此行，話每次去都會睇吓啲工業園最新發展，今次去iLand park呢個工業園，已有製衣廠進駐，最大嘅達100萬呎，佢話真係有得發展，特別喺國際形勢下，分散生產基地較安全。至於佢跟進咗幾年嘅引入緬甸外傭，Felix透露今次見到好大進展，當地政府已安排地方開設培訓學校，佢估計今年最快下半年就可以引入，相信緬甸姐姐嚟到香港，首批係會負責照顧獨居長者。

可能唔少人覺得緬甸比較落後，Felix話當地消費唔高，有朋友帶佢去食法國菜，200幾港元已經食到4道菜，包括油封鴨腿等，形容如果呢餐喺香港食，埋單隨時要800元。佢仲有遇到20幾歲嘅港人喺當地工作，大家有交流一下。