【明報專訊】民主黨噚晚喺九龍灣舉行23周年黨慶酒會同晚宴，筵開50多席，到場政商人物同官員星光熠熠，各民主黨員使出渾身解數籌款，最終籌得500萬元。今年黨慶以「頂硬上」為主題，自嘲缺錢要撲水，其中主席胡志偉同黨友尹兆堅更要「秘撈救黨」，分別去咗茶餐廳做水吧同豬肉檔做員工，並拍片喺晚宴播放，贏得唔少掌聲。

上年領展贊助　今年小冊子反賣產

民主黨上年黨慶送畀嘉賓嘅小冊子上，印有領展廣告贊助，呢則廣告曾喺網上引起風波。今年民主黨似乎汲取咗教訓，無喺小冊子登任何廣告之餘，更加入「反對領展變賣資產 」章節。今年黨慶有地產商及支持者買枱贊助，但就好似無領展份。

特首林鄭月娥坐喺名為「民主」嘅主家席，不時跟志偉密密斟。志偉落力演出，即場獻唱關正傑嘅《大地恩情》娛賓，現場仲播放「撲水」短片，話志偉要去區內茶記兼職搵錢，短片中佢落單、冲奶茶、整多士一腳踢。至於近年心廣體胖嘅尹兆堅，就話要「賣肉救黨」，喺短片中著住白色背心扮演「豬肉佬」飲Dry Martini，去北葵涌街市客串賣豬肉，入型入格。

民主黨噚晚籌到約500萬元，去年佢哋就公布籌得超過760萬元。