葉劉讚卿姐裸退 無爭「政府賞賜」

葉劉淑儀（前排右三）大年初三出席聚會，遇上劉慧卿（前排左二）。（葉太facebook圖片）

【明報專訊】傳統農曆新年大年初三「赤口」通常都避免聚會免生口角，不過新民黨主席葉劉淑儀就喺初三巧遇民主黨前主席劉慧卿，佢哋仲同枱食飯𠻹。葉太喺facebook上載合照，原來佢哋一齊出席由「倫敦經濟學會」校友安排嘅聚會。

葉太話，卿姐離開立法會後好少同佢見面，今次見到卿姐，「慶幸她仍別來無恙，風采依然」，而卿姐同佢講現時清閒過以前好多，葉太就形容對方「堅持己見」嘅態度就一直都無變，例如卿姐仍然希望有普選，葉太就指出普選須喺「8．31框架」下進行，才有望通過，葉太話雖然同卿姐政見唔同，但十分欣賞對方嘅執著。

葉太仲話，敬佩卿姐當年協助林卓廷當選，自己則選擇「裸退」，離開立法會後亦無借用其政治本錢，向政府換取任何賞賜，形容呢份堅持原則嘅信念，實在十分難得。