嘔吐物有血 手術4小時留醫ICU 蔡堅胃扭轉移上橫隔膜

蔡堅胃扭轉，搞到又嘔又痛，前晚入院做咗4個鐘手術，個胃重回正位，但係蔡醫生仲要抖吓。（蔡堅facebook）

【明報專訊】70歲嘅醫學會會長蔡堅噚日朝早，喺facebook話自己入咗浸會醫院深切治療部，真係嚇人一跳。Emily即刻打去問候，蔡堅話佢個胃「蹺埋咗」，移咗去橫隔膜上面，搞到食乜嘔乜，仲嘔吐物帶血，食道被壓住又搞到劇痛。前晚做咗4個鐘手術，佢個胃終於重回正位。

蔡堅噚日把聲沙沙哋，佢估可能嘔嗰時傷咗喉嚨。佢其實患咗胃扭轉，胃部原本喺橫隔膜下面，一般可以放1000cc物質，佢個胃移咗去橫隔膜上面，胃液、血及化解咗嘅食物落唔到去腸，積到有成3000cc，所以脹到好犀利，成個胃頂住，食道受壓搞到劇痛，前晚大嘔，嘔吐物仲有血。

百足咁多爪嘅蔡堅前日本來約咗中大公共衛生及基層醫療學院院長楊永強傾醫療改革，但係病到咁，緊要入咗醫院先。蔡堅前晚8點到噚日凌晨零時接受手術，噚日朝早已拔胃喉，最少一星期先至可以恢復正常飲食，家陣要多留院幾日。

蔡堅話，近排個胃確係唔舒服，但一直忙無時間處理。醫學會7月就要換屆，蔡堅唔再續任會長，佢話到時就可以開少啲會。Emily希望蔡醫生有無做會長都好，要保重身體，多啲休息，早日康復呀！

更多港聞

新舊處長新聞官重遊美利舊地

【明報專訊】前身為政府大樓美利大廈、現已活化為酒店的The Murray現正試業，準備2月底正式開業；投資70億元嘅發展商九龍倉集團，噚日請... 詳情

知兩文三語重要 譚鐵牛學廣東話

【明報專訊】中聯辦噚日喺銅鑼灣同新一屆嘅香港全國政協委員同港區人大代表開新春茶話會，中聯辦有幾個副主任出席，包括譚鐵牛。中聯辦主任王志民平時... 詳情

廣福義祠外牆新裝 展傷健藝術家作品

【明報專訊】位於上環太平山街、俗稱「百姓廟」嘅廣福義祠，有超過100年歷史，係東華三院發源地，亦係本港少數供奉亡魂嘅百年古廟，目前列為二級歷... 詳情