【明報專訊】俗稱「棚仔」嘅深水埗欽州街臨時布販市場兩年幾前起面臨清拆，政府噚日宣布獲市建局通過出租通州街一個重建項目嘅5層商業平台，成立「設計及時裝基地」，實用面積大概3.8萬呎，交畀香港設計中心負責營運，培育新晉時裝設計師。 附近「棚仔」商販料無緣遷入 Emily留意到，時裝基地同「棚仔」位置好近，問到會唔會喺基地安置「棚仔」嘅商販，商務及經濟發展局長邱騰華話，食環署研究緊「棚仔」嘅搬遷安排，會繼續同商販傾，不過基地嘅目標同服務對象與「棚仔」唔同，意味住「棚仔」商販搬入基地機會好渺茫。 市建局通州街重建項目喺2023/24年度落成，邱騰華話希望好似上環PMQ(元創方)咁，以優惠價租畀新嘅設計師，又吸引買家、採購公司去嗰度，創造合作商機。佢又透露政府打算將基地發展做深水埗嘅景點，同緊旅發局傾，下半年開始加強宣傳。旅發局主席林建岳話歡迎成立基地，旅發局今年另一大型項目將推廣深水埗特色，時裝係推廣重點之一。 新晉設計師初創機會 政府下周會去區議會簡介時裝基地嘅計劃，文件指出，新晉設計師可以喺基地展出作品、開發初創事業，甚至推出設計品牌，亦可以同社區嘅批發、零售活動配合，成為全港具特色嘅時裝設計焦點。設計中心主席嚴志明希望基地可以做培育工作同共享工作空間，亦會同學術界、業界組織連繫。
|
| |
| |
