【明報專訊】港台節目《城市論壇》噚日首次移師政府總部東翼前地(俗稱公民廣場)舉行，一眾「維園阿伯」無懼風雨繼續出席「撐場」。香港眾志主席羅冠聰喺2014年因為呼籲市民參與衝入「公民廣場」，去年刑期覆核時被判入獄，保釋緊嘅阿聰喺節目中形容重回舊地「百味陳雜」，但指𠵱家所謂重開係言過其實，因為仲有圍欄封死廣場。 噚日天氣麻麻，節目期間落微雨，但一眾「維園阿伯」、「黃絲」或「藍絲」嘅「熱血」都無被淋熄，大家繼續喺場內叫囂、場外偶爾播吓國歌。節目主題係「一元復始」，嘉賓包括羅冠聰、中央政策組前顧問劉細良、 全國政協委員譚耀宗，以及自由黨區議員楊哲安。被褫奪立法會議員資格嘅社民連梁國雄(長毛)就喺台下做觀眾。 阿聰﹕唔算重開 譚耀宗﹕有限度係好事 東翼前地最近先重開，但平日只用作政總嘅車輛、訪客及職員嘅通道，市民若想集會就要向行政署申請，而且集會只限星期日同公眾假期。阿聰形容𠵱家根本唔叫重開，因為市民唔可以自由出入做政治示威，仲有圍欄封死晒，「真正重開係拆晒啲圍欄」。 同場嘅譚耀宗話，「呢度唔係公民廣場，只係政府東翼一個閘口，畀車同需要去政總辦事同上班嘅人出入」，指東翼前地一日到黑被霸佔係唔好，話有限度開放，作為通道係好事。
|
| |
| |
;){kind=small}
