【明報專訊】立法會「研究動物權益相關事宜小組委員會」噚日提交報告，交代過去一年嘅商議工作，當中提及委員普遍認為政府應考慮設立「動物警察隊伍」，專責調查殘酷對待同遺棄動物嘅案件。
指政府應為執法者提供培訓
根據報告，委員認為除咗設立「動物警察隊伍」，政府仲應該為前線執法人員提供適當培訓，提升佢哋調查殘酷對待動物案件嘅能力。報告引述政府指出，警方好重視防止殘酷對待動物嘅工作，話由2011年開始已經推行「動物守護計劃」，警方有需要時會邀請漁護署同愛護動物協會嘅人提供專業意見。
另一方面，小組委員會認為香港缺乏周全嘅動物福利法，再次促請政府全面檢討關於保障動物福利，以及防止殘酷對待動物嘅法律條文。報告引述政府話，覺得現階段唔需要制定全面嘅保護動物綜合法例，但會繼續檢視關於保護動物嘅法例條文，確保符合最新情况。
仍想研究跟進流浪動物
本來呢個小組委員會喺12個月工作期限完結後，就要停止工作，但啲委員覺得，當下仲有好多事需要研究跟進，包括流浪動物，如流浪牛嘅處理，及處理同打擊殘酷對待動物案件嘅政策，因此小組委員會將繼續工作多12個月。
