【明報專訊】民建聯噚日元旦公布一個有關市民對過去一年嘅評價及對新一年期望嘅調查，結果顯示，市民過去一年總體開心指數平均分係3.38分(滿分5分)，反映大家對生活嘅開心程度都比較樂觀；至於對社會評價，有33.3%受訪者將過去一年政治環境評為「好複雜，好難評論」。 民建聯主席李慧琼噚日聯同好大機會參選新界東同九龍西補選嘅鄧家彪、鄭泳舜一齊開記招，公布民調結果，似乎想兩人多啲曝光。民記喺上月18至31日以電話隨機抽樣訪問510名市民，顯示市民對2017年最令人印象深刻嘅社會事件「修改議事規則」及「6名立法會議員喪失議席」排名相同，都有21.2%。至於市民對2018年預期、希望政府解決咩問題，有36%受訪者認為「一定會好過2017」，而「政治爭拗」及「樓價高企」就分別係受訪者中最希望政府能夠解決嘅兩大問題，分別佔24.5%及30.3%。 民建聯話，可以用「迎接新一年 把握新機遇」總結調查，佢哋亦會提供相應建議，回應市民聲音，希望政府未來一年做得更好。
|
| |
| |
