經民聯5周年酒會 變人代拉票場

經民聯5周年酒會變人代拉票場

[2017.12.13] 發表

【明報專訊】經民聯今年成立5周年，噚晚喺會展舉行盛大晚宴，請到特首林鄭月娥、中聯辦副主任譚鐵牛同問責官員出席。呢個場合雲集政商界名人，唔少係港區人代嘅選民，所見有20多名港區人大代表選舉參選人現身，包括藝人鄺美雲、政制及內地事務局前局長譚志源等，佢哋積極同在場人士打招呼、派卡片，令現場變成人大拉票會。

律師會前會長林新強亦係參選人之一，不過佢話月初公幹時，自己爛瞓，結果瞓捩頸，痛楚難當，返港後睇醫生足足瞓咗3日醫院，噚日要戴住頸箍拉票，影響到選舉工作。

經民聯主席盧偉國致辭時話，經民聯轉眼5歲，雖然仲係小朋友，但過去5年同市民一齊經歷咗不少風雨，而喺各界支持下，經民聯茁壯成長，致力捍衛香港營商環境，為業界福祉做實事。

經民聯監事會主席林建岳就話，國家主席習近平七一到港出席香港回歸20周年活動好順利，香港局勢自回歸以來出現根本性嘅好轉，又話林鄭月娥上任以來獲各界支持，開局良好。