【明報專訊】回歸後首任行政會議召集人、香港政壇元老、人稱「大Sir」嘅鍾士元噚日100歲大壽，喺會展筵開數席慶祝，一班政商巨頭現身為佢賀壽。作為主角嘅鍾士元噚日打咗條紅呔，雖然行路要用助行器同要人攙扶，但精神好好，入宴會廳前被問到有咩生日願望、有咩同香港人講，佢就笑笑口咁話自己「未唞順條氣」。 旁人攙扶 精神飽滿 到賀者個個都係重量級，政界方面有特首林鄭月娥、前律政司長黃仁龍、前政務司長陳方安生同唐英年，仲有基本法委員會副主任梁愛詩、前行政立法兩局議員李鵬飛、民政事務局前常任秘書長李麗娟等。李麗娟話，大Sir身體好好，定期都有同一班老友食晏。 商界方面就有九倉集團前主席、現任首席顧問吳光正，東亞銀行主席李國寶同帝國集團主席郭炳湘等。 可能有人疑惑，鍾士元上年都已經搞過百歲生日派對，佢個仔噚日就同Emily解釋，用西曆計算爸爸今年先100歲，按中國人計法就101歲。佢又話，嚟緊仲會有幾場宴會為爸爸賀壽。 陳方安生談曾案：盼政府罷手 另外，前特首曾蔭權被控行政長官收受利益罪，8人陪審團未能達到大比數有效裁決，法官噚日宣布解散陪審團。陳方安生質疑，第二次解散陪審團，因為未能有大比數共識作裁決，「是否顯示控方證據不足以說服陪審團」，佢希望特區政府能夠罷手。她解釋，「繼續上訴只會加深市民(質疑)，係咪一定要窮追猛打呢？既然已經係第二次(解散陪審團)，唔好再浪費公帑。」
|
| |
| |
;){kind=small}
