曾案撞正WhatsApp癱瘓 法庭記者報料嗌救命
[2017.11.04] 發表
【明報專訊】「慘啦！WhatsApp壞咗呀！？」Emily噚日下畫同唔少巿民一樣， 發現自己個WhatsApp不斷停留喺「連線中」階段，無論是工作或個人親友聯絡都大受影響，而噚日WhatsApp癱瘓嘅初期，正正是4點幾曾蔭權案陪審團再有問題向法官查問嘅時候。Emily聽講，唔少公司一向透過WhatsApp溝通嘅法庭版行家，報料都大受影響，要急急轉用其他溝通軟件，例如iMessage、Facebook Messenger、 Kakao，同公司嘅同事聯絡番。Emily就慶幸工作報料用開Kakao軟件，冇受到WhatsApp癱瘓影響。
癱瘓約1小時 fb：正調查原因
高院審訊曾蔭權案法庭門外，噚日聚滿大批跑法庭新聞嘅記者等候結果，4點幾法庭大門突然打開，大家知道又有新進展之際，同一時間唔少記者都發現用唔到WhatsApp，嗌晒救命，有人即時下載其他通訊軟件，有人暫時用私人通訊戶口同「上司」溝通，等到法官正式宣布要解散曾蔭權案嘅陪審團嗰陣，WhatsApp先至恢復正常運作；看來在現今通訊年代，唔同單位包括傳媒機構通訊軟件上都要有兩手準備。
作為全球最多人用嘅通訊軟件，WhatsApp𠵱家有兩億用戶，根據外電報道，除咗香港，喺新加坡、馬來西亞、印度、巴西、越南、俄羅斯、緬甸嘅用戶都受到今次長約1小時嘅服務癱瘓影響。持有WhatsApp嘅Facebook發言人噚日回應，仲調查緊今次事故原因。
更多港聞
【明報專訊】有機構喺周四（11月2日）舉辦2017博鰲亞洲青年論壇（香港）活動，活動曲終人散，而官方「新華社」一日內發出兩篇新聞稿報道呢次活...
詳情
相關新聞
