【明報專訊】前特首、全國政協副主席梁振英一直大力推廣作為國家戰略嘅「一帶一路」同大灣區，早排仲出任新成立嘅「一帶一路國際合作香港中心」、「大灣區香港中心有限公司」董事。佢噚日喺博鰲亞洲青年論壇發表演說，不忘呼籲香港年輕人要把握兩者嘅機遇，要有「走出去」嘅精神，持正確態度，正確咁了解各地民情、制度等，關顧各地人民同保護各地環境。CY話卸任特首後，仍經常喺外邊跑，過去4個月集中推廣大灣區、一帶一路，每日工作時間同做特首差唔多。

CY又話隨住廣深港高鐵、蓮塘香園圍口岸、港珠澳大橋等基本建設落成後，香港「超級聯繫人」嘅作用將會更明顯，好有條件促進內地同國際嘅貿易。

王志民：期望港青與國家同步發展

出席同一論壇嘅中聯辦主任王志民，都有解讀中共總書記習近平早前嘅十九大工作報告，習近平嘅報告將「一國兩制」列為新時代堅持和發展中國特色社會主義嘅14條基本方略之一，顯示國家對「一國兩制」好關注，指出香港重新納入國家治理體系嘅新定位，佢又期望本港青年與國家同步發展。