【明報專訊】職：職員
何：副校長何卓銘
記：記者
10月4日 記者以學生身分向學校查詢
記：我中四讀咗兩個月，冇讀過中五，想中六畢業，請問有何最快選擇？
職：如果只想有中六畢業證書見吓人，呢張(課程A)夜校證書，加成績表，明年3月讀完，10月23日開學，呢個就唔考DSE㗎喇。呢個OK啦，唔係太難讀，但我哋有要求，八成出席率同40分及格。課程考地產都得，6個月搞掂。6個月呢個叫做容易啲，可以achieve到，又可以拎番張證書，𠵱家個個都話中六學歷，但你冇證書，咁點算？佢都唔係返得好緊要，係得兩個月返得密啲，其他都冇咁密啫。
記：咁讀完呢個考唔考到DSE？
職：唔得，考DSE嘅係另一個課程(課程B)，(課程A)只不過係當地產用，你讀完呢個有中學學歷，但唔係畀你考DSE。真係考DSE嗰個課程深啲，同埋開晒班，真係深啲，日日都要返學，你睇吓個分別幾大(拿出兩個課程的校曆表)，你會辛苦啲。大家都要拎40分，呢個(課程A)容易啲，嗰個(課程B)辛苦啲，40分先拎到證書喎。
記：兩張證書有唔同㗎？
職：證書有少少分別，但出面啲人睇唔到個分別。你有本事咪考DSE，冇本事就報呢個(課程A)，拎張證書。
記：如果我想做保險呢？
職：呢個(課程A)唔擔保你入到保險。如果你想做保險，讀中五(課程C)，10個月搵陣啲。
10月19日 記者向副校長何卓銘查詢
記：職員跟我說4期學費的課程(課程A)不用考DSE，淺些易畢業啲，是否真有其事？
何：我們會極力推薦學生考DSE，但最後由學生選擇。課程係DSE準備課程，一開始會簡單啲，個目標冇變，內容係為鋪排學生考DSE，但唔會強迫佢哋一定要考。
記：為何比要考DSE的課程遲了個半月才開學？上課時間較少，如何裝備學生考DSE？
何：因要讓其他學校拒絕的學生有足夠時間報讀本校……雖然時間有分別，但其實係彈性啲，我哋好多補習班喺背後，學生可因應需要上補習班。
課程A：由10月23日至3月中旬的中六課程
課程B：由9月上旬至2月的中六課程
課程C：中五課程
