【明報專訊】香港攝影記者協會舉辦嘅「前線‧焦點2016」新聞攝影比賽前排公布咗結果，得獎作品喺浸會大學擺相片展，畀市民感受新聞事件的一剎。作品中，有《明報》攝影記者鍾林枝獲獎嘅兩張相，一張相係記錄李波失蹤3個月後返港，喺傳媒追訪下登上七人車離開寓所一幕，攞到一般新聞組亞軍；另一幅作品拍攝因車禍截肢嘅梁文禮，喺陽光下裝上刀片義肢重踏跑道，備戰10公里馬拉松賽事，攞到體育組季軍。

得獎作品當然唔止咁少，由其他傳媒攝記操刀嘅佳作，記錄香港重要事件，例如旺角大衝突、立法會選舉、銅鑼灣書店經營者李波同店長林榮基相繼被內地拘禁等。《星島日報》攝記林金展嘅作品就記錄咗旺角大衝突期間，示威者喺旺角街頭焚燒雜物同警員對峙，評審認為反映到市民同政府嘅對立面，令讀者反思香港嘅未來，奪得「年度圖片」。

協會由即日起至14號，喺浸大教學及行政大樓3樓平台舉辦「前線‧焦點2016」得獎作品展，總共展出123幅照片(包括6組圖片故事」，免費入場。至於今屆增設嘅多媒體比賽項目，得獎作品就可以透過現場展板上嘅二維碼(QR Code)或者去協會YouTube網上視像頻道欣賞。