聲援反東北雙學獄中16人 泛民籲市民一人一信

非建制派立法會議員郭家麒（右二）、張超雄（右三）、朱凱廸（右一），同埋被取消議員資格嘅社民連梁國雄（左二）噚日喺灣仔擺街站，呼籲市民以「一人一信」形式聲援獄中嘅16個社運人士。（蘇智鑫攝）

【明報專訊】律政司早前申請覆核刑期成功，反東北前期撥款案嘅13名社運人士同重奪「公民廣場」(即政府總部東翼前地)案嘅「雙學三子」被判監禁，刑期由6至13個月不等，一班非建制派議員噚日係灣仔設街站，呼籲市民繼續以「一人一信」嘅方式支援獄中嘅佢哋，有唔少市民都有寫低想同佢哋講嘅說話。立法會議員朱凱廸亦喺facebook分享佢早前探社民連副主席黃浩銘嘅感受，希望市民繼續支援喺獄中嘅16人。

阿廸噚日喺facebook帖文，分享佢8月30日到赤柱監獄探望16人之一、社民連黃浩銘嘅感受，仲有幾單官司喺身嘅阿銘，可能將要承受嘅刑期唔短，所以被編到赤柱監獄，亦係16人之中唯一一個住赤柱。阿廸又話阿銘住單人倉，除咗面積較細，通風都唔係咁好，即使有風扇放喺走廊，都吹唔到入去個倉，夏天瞓覺會熱醒七八次，開窗就有蚊蟲，閂窗就會好焗，阿廸形容呢個係一個「磨人的環境」，好需要係監獄外嘅市民繼續支援。

因東北案正服刑嘅何潔泓亦喺獄中寫信，佢嘅fb專頁亦發布信件，佢形容自己喺獄中「內心平和、心底寬靜，不用擔心」，又話不論身在何處，佢哋思想同意志都係自由。

更多港聞

政府吹和風？ 梁繼昌入工貿諮詢會

【明報專訊】政府噚日公布擴大工業貿易諮詢委員會廣納意見，並公布新委任成員名單，估唔到被前特首梁振英控告誹謗嘅會計界立法會議員梁繼昌（Kenn... 詳情

「前線．焦點」得獎作品展出

【明報專訊】香港攝影記者協會舉辦嘅「前線‧焦點2016」新聞攝影比賽前排公布咗結果，得獎作品喺浸會大學擺相片展，畀市民感受新聞事件的一剎。作... 詳情