七一籌款 社民連吸金稱王

[2017.07.03] 發表

【明報專訊】今年七一遊行人數較往年少，但市民捐款都相當慷慨，多個非建制政黨團體公布七一街站籌款結果，今年籌得最多嘅係社民連，有50.8萬元，其次係香港眾志，有43.2萬元；上年籌款金額排第二嘅公民黨今年大跌18萬，只得26萬元。

公民黨籌款跌18萬

社民連噚日搞抗議活動，但未出發已被人滋擾及襲擊，仲反而被警方扣查。社民連膺「吸金王」，較上年多成9萬元，黨副主席黃浩銘話咁代表市民認同佢哋嘅抗爭手法，亦對近日警察嘅針對非常不滿，加上知道長毛梁國雄同佢都有官司在身，「所以用捐款表達支持」。人民力量就籌得16.5萬元，少上年3.5萬元。

眾志黃之鋒就話多謝市民支持，又特別多謝市民上前慰問該黨一眾被捕者，佢話由於羅冠聰被政府司法覆核議席案未有結果，款項會作「未雨綢繆」之用。另外，前學民思潮發言人張秀賢喺6月底成立嘅議政平台「立言香港」則籌得3.6萬元。

專業議政「第一次」籌19萬

由7名非建制派議員新組成嘅「專業議政」首次擺七一街站就籌得19萬，佢哋話除咗向民陣捐出10%款項，扣除街站成本後，將全數存入「核心價值基金」，支援梁繼昌、邵家臻、姚松炎法律訴訟使費。小麗民主教室今年亦籌得19萬元。

民主黨、工黨和新民主同盟，則分別籌得約17萬、12.8萬同7.5萬元。部分政團話會上繳一成捐款畀民陣。工黨話，扣除成本及籌款額10%支持民陣外，其餘全數轉畀守護公義基金，支持佔中被檢控人物。

更多港聞