「不對稱劍擊鞋」 發明展獲獎

「不對稱劍擊鞋」發明展獲獎

[2017.05.15] 發表

【明報專訊】最近香港運動員喺國際嘅劍擊比賽中奪得佳績，運動員除咗要鬥智鬥力同身手敏捷，劍擊裝備亦係關鍵。香港紡織及成衣研發中心因應劍擊健兒雙腳有唔同需要，特別研發左右設計各異、選料配搭不一嘅運動鞋，加強保護佢哋雙腳。呢對「不對稱劍擊鞋」早前更喺日內瓦國際發明展獲得銀獎殊榮。

前腳改善避震後腳更耐磨

劍擊運動員經常維持屈膝半蹲姿勢，雙腳重複蹬地、拖曳受壓，好容易受傷，劍擊鞋也因此好快磨損。不對稱劍擊鞋以透氣物料縫製，鞋底採用天然橡膠，舒適輕巧，運動員動作可以更靈活。而為改善運動員前腳壓力分佈，研究員喺鞋墊同底部加入避震物料，足弓位置用上較硬材料，避免運動員扁平足問題惡化。至於後腳著嘅鞋，鞋面近足弓位置就用較耐磨嘅物料，令運動鞋更耐用。

不對稱劍擊運動鞋研發成本2,797,000元，全數由政府創新及科技基金贊助，香港代表張家朗都著過呢款鞋受訓。香港紡織及成衣研發中心話，未來會為乒乓球、羽毛球運動員研發左右腳設計不一嘅運動鞋，配合運動員嘅特別需要。