【明報專訊】百物騰貴，唔少打工仔當然希望慳得1蚊得1蚊，尤其係每日來回返工放工嘅交通費。九巴早排話研究緊推行月票，唔少政黨都希望九巴盡快推出，噚日新社聯20幾名代表，包括立法會議員陳恒鑌同周浩鼎就走去政府總部請願，話九巴舊年純利有成8.3億元，但過去10年票價有加無減，令巴士車費高企，加上政府已經向九巴批出新嘅專營權，九巴好應該進一步回饋市民，盡快落實月票計劃。 不過，新巴同城巴就同Emily講，九巴未同過佢哋商討合作推出月票制度，又解釋每間巴士公司嘅覆蓋網絡、財務狀况，以至每條路線面對嘅經營環境都好唔同，所以唔能夠直接比較。新巴同城巴又話，佢哋兩間巴士內部過往都曾經探討推出月票，但由於每條路線嘅車費差異好大，要定出月票價格好困難；如果月票提供較大嘅折扣優惠，會令巴士公司收入減少，有可能需要調整票價，所以到𠵱家都未有推出月票嘅打算。唔知之後政黨又會唔會要求新巴城巴都推出月票呢？
|
| |
| |
