【明報專訊】仲有唔夠兩個月，林鄭月娥就正式成為本港首名女特首，候任特首辦噚日公布，為林太開咗個網站，網站除咗有佢嘅政綱同出席活動相片，內容主要係舊資料。另外，網站上載咗佢獲贈禮物名冊，公布佢收到估值400元或以上嘅禮物，顯示佢喺3月26日當選後兩日，收到兩個花籃及兩盆蘭花，而佢並無要求保留，將禮品交由政府處理。 林太噚日開咗網站，暫時同網民欠缺互動，而佢曾話過會善用其他社交平台，唔知佢會唔會創造職位請人幫佢開facebook或其他社交平台帳戶呢？ 民調：林鄭民望再變負淨值 另外，港大民意研究林鄭計劃噚日發表民意調查結果，顯示候任特首林鄭月娥4月底嘅評分有52.6分，跌3分，支持率42%，反對率49%，民望淨值負7個百分點。換言之，佢嘅支持度淨值下跌9點，再度變回負支持度淨值候任特首。 港大民研喺上個月24至27日以隨機抽樣方式，以電話訪問1006名市民。至於現任特首梁振英，最新評分有41.5分，支持率26%，反對率66%，民望淨值係負40個百分點，比4月初升7個百分點。
|
| |
| |
;){kind=small}
