關心土地問題保護郊野公園 小學生畫海底城贏回歸海報賽

回歸20周年畫作比賽冠軍作品《愛港建港未來香港齊共創》，由陳守義創作，主題係香港土地供應不足。

噚日嘅頒獎典禮，有政務司長張建宗（右三）做嘉賓，小學組嘅頭三甲同優異獎同學，特登拎埋得獎畫作同佢合照。

【明報專訊】今年係香港回歸20周年，政府舉辦超過320個活動慶祝。噚日就有特區成立20周年海報設計及短片拍攝比賽頒獎典禮，政務司長張建宗都有出席；Emily噚日睇到其中海報設計比賽小學組嘅頭三甲作品，都忍唔住要讚吓𠵱家10歲細路嘅創意。

海報設計比賽主題係「我到二十歲時……」，配合「回歸20年」，要小學生幻想到佢哋20歲時香港會變成點。得到季軍嘅畫作係《香港一號，一飛冲天》，一架叫「香港一號」嘅載人穿梭機，對翼上有中國同香港特區旗，經濟分析師、警察、消防同法官等人都喺煙花下歡呼。作者朱靖鋒話，見好多大國都有自己研發嘅載人穿梭機，到佢20歲時，香港回歸30年，「香港係時候要有自己嗰部」，但可能需要同內地合作一齊研究航天科技。

亞軍作品係《香港人的反思——垃圾香港》，氣氛好灰暗，畫中人要戴面罩出街抗毒氣，香港已變垃圾城。作者劉子泓話，佢最關心10年後，即係自己20歲時，香港會唔會已經烏煙瘴氣，希望大家𠵱家開始環保救港。

而冠軍作品《愛港建港未來香港齊共創》最合今屆政府心意，主題係講香港土地供應不足嘅問題，作者陳守義話，與其要開發郊野公園破壞其他生物嘅屋企，不如用巧妙設計建海底城，等香港人同海豚一齊生活咁話。

得獎作品會未來6個月會喺全港地點舉辦嘅「香港特別行政區成立二十周年巡迴展覽」展出。

更多港聞

AY羅冠聰 電競賽獻技

【明報專訊】電子競技（電子遊戲比賽）近年喺香港開始受關注，一向關心電競發展嘅香港眾志羅冠聰，近日就同公民黨黨魁楊岳橋（AY）拍片，預告兩人今... 詳情

復活節千人學雕兔 破世界紀錄

【明報專訊】復活節假期噚日開始，有1082名中小學生齊齊喺沙田馬場上課學雕兔仔，應節之餘，仲打破咗健力士世界紀錄，成為「最大規模的雕塑課」。... 詳情

長毛過到關 劉國勳好開心

【明報專訊】立法會發展事務委員會組團考察東江水兩日，無（回鄉）證嘅社民連梁國雄（長毛），早前攞到一次過嘅通行證，噚日朝早同其他議員一齊成功過... 詳情

退出政壇 毓民：唔會再參選

【明報專訊】去年落選立法會嘅前議員黃毓民，噚日喺facebook貼出8000字長文，表明自己會「向政治說再見」，「不再從政，退出政壇；包括不... 詳情