阻性傾向歧視立法 關注組菠蘿贈陳章明

性傾向條例家校關注組召集人黃偉明（前左）噚日向平機會主席陳章明（前右）送贈菠蘿，話「菠蘿」係英文「block」嘅諧音，意思係阻擋平機會推動訂立《性傾向及性別認同歧視條例》。

【明報專訊】平機會上月發表聲明，呼籲政府立法保障性小眾免受歧視，性傾向條例家校關注組召集人黃偉明等人噚日去平機會抗議，仲向平機會主席陳章明送「菠蘿」，取其「block(阻止)」嘅諧音，表明要阻止政府立法。

話平機會無權要求立法

關注組發聲明話，平機會無法定職權要求立法，指平機會嘅職權，只係限於執行現有嘅4條歧視條例。同時，關注組認為平機會無理據要求立法，指平機會發表嘅歧視研究報告中，雖然寫明「大多數社會大眾支持立法保障LGBTI人士」，但報告只講有55.7%嘅人支持立法，關注組覺得55.7%只係稍多於一半，喺考慮誤差後，根本唔可以肯定係「大多數」。LGBTI係指男女同性戀者、雙性戀者 、跨性別人士及雙性人。

關注組又強調，即使聯合國建議香港要立歧視法，港府亦無義務要遵從，因為聯合國嘅意見根本無任何法理上嘅約束力。關注組仲話，平機會聲明中有外國駐港領事館聯署，質疑係教唆外國干預特區事務，涉嫌違反《基本法》。

更多港聞

邵家臻探監﹕曾健超變「冤情大使」

【明報專訊】公民黨前成員、七警案「主角」曾健超（Ken）早前放棄上訴，為佢去年被裁定嘅一項襲警同兩項拒捕罪服刑，將於今個月20號出獄。社福界... 詳情

成員年初晤梁愛詩劉兆佳 發展局前政助搞智庫 主打年輕人

【明報專訊】特首選舉後，又有新智庫本月內會成立，Emily聽聞搞手係發展局前政治助理何建宗，智庫主打年輕人，叫做「一國兩制青年論壇」。據其網... 詳情