小牛遷走失蹤 關注組批漁署拆散母子

小牛遷走失蹤關注組批漁署拆散母子

[2017.03.28] 發表

【明報專訊】現時全港約有1000隻流浪牛，主要分佈於大嶼山、西貢、新界中部及東北部。西貢牛關注組指出，去年西貢十四鄉有兩隻小牛因為受傷先後被漁護署帶走，之後發現佢哋被放逐到約10公里外嘅西貢創興水上活動中心，認為漁護署拆散母牛與小牛，令佢哋骨肉分離，遂發起網上聯署，要求政府盡快將圈禁嘅小牛放回母牛身邊，並停止捕捉及遷移牛隻行動。

關注組噚日邀請關注動物權益嘅立法會議員毛孟靜，前往西貢東郊野公園內嘅創興水上活動中心視察，發現該處土地貧瘠、草源稀疏，唔適合牛棲息，兩隻被迫同母牛分離嘅小牛亦唔見蹤影。

關注組批評漁護署遷牛政策唔合理，要求署方盡快將兩隻編號715及719嘅小牛，放回母牛身邊。毛孟靜就話，佢曾就事件要求約漁護署開會但遭拒絕，署方話會喺下次立法會動物權益小組委員會開會嘅時候交代。

漁署：遷移地有水草唔怕車撞

漁護署噚晚回覆，話該署於2011年底實施「捕捉、絕育、遷移」計劃，以長遠管理流浪牛，現仍繼續進行，至於選擇於西貢創興水上活動中心一帶為遷移地點，原因係該處本身有牛棲息嘅地方，又有足夠草源同水源，加上該處同市區公路有一定距離，即使無加圍網，牛都可以喺公園自由游走，唔怕畀車撞倒，但該署始終未能交代兩隻小牛嘅去向。