林太盼與記者深談 胡官為網媒場外受訪
【明報專訊】記協就政府將網上媒體記者「拒諸門外」進行緊司法覆核,候任特首林鄭月娥噚日話,上任後會認真積極考慮有關問題,仲話競選期間,自己舉行嘅發布會都有邀請網媒出席採訪。林太又話,上任後亦希望盡快同前線記者見面深談,聆聽前線記者關注嘅事情。
記協噚日隨即喺facebook上載一幅林太早前出席記協座談會並簽署《新聞自由約章》嘅相,又加上hashtag(標記)「唔好走數」。而敗選嘅胡國興噚日就特地唔喺會展入面會見傳媒,改為喺港灣道入口同傳媒做訪問,佢話自己好重視網媒,知道有啲網媒入唔到去會場,特登喺出面見傳媒。胡官嘅公關仲確保網媒同傳統媒體記者都喺晒度先做訪問。
公眾席爆滿 有網媒入唔到場
唔少網媒因為入唔到大會嘅指定採訪區,噚日只能排隊進入公眾席,不過公眾席1000個位好快爆滿,大會之後叫網媒記者排隊輪候候補席,但最終唔少網媒都入唔到場,只能夠喺「核心嘅外圍」採訪。