【明報專訊】特首候選人拉票行程緊密，港九新界四圍走。已經宣布參選嘅退休法官胡國興噚晚7點幾坐私家車途經灣仔伊利沙伯體育館對出嗰陣，遇到交通意外，同架切線嘅泥頭車相撞，都咪話唔驚險。胡國興話，當時泥頭車切線駛到埋嚟，自己坐喺駕駛座隔籬，都未知係撞車，只係以為「踩到嘢」，成架車彈起。佢事後喺facebook上載座駕受損情况，Emily見到，成個右邊車門撞扁。當時車上除咗佢個女，仲有幾個競選辦團隊，好彩無人受傷。

不過意外無影響到胡官嘅行程，佢之後就現身北角東寶小館，神情輕鬆，同食客大打招呼，仲好受歡迎，在場有人高呼「胡官！」，胡官又拍片報平安，強調自己會繼續「戰鬥」求勝。