【明報專訊】青年新政梁頌恆被法庭裁定喪失議員資格，令立法會新界東有一議席出缺待補，曾經喺同區出戰嘅上水鄉委會主席侯志強(強哥)，噚日出席鄉議局會議前就透露，自己「積極考慮」參加新界東嘅補選，仲話「有啲人叫病態賭徒，明知輸，傾家蕩產都要走去賭」。咁有無信心攞多啲票？強哥話輸贏唔係問題，肯參與先叫做體育精神喎。

強哥喺上年9月立法會選舉，面對22張名單爭9席嘅大混戰下，最終只得6720票落敗，比起當選議員至少有3.5萬票或以上，都真係有一段距離。強哥噚日就話「上得賭枱都係為興趣」，但都要等政府公布幾時補選先，到時再「慎重考慮」，無謂報咗名又話退選，「一係唔報，報咗就要去，打死罷就！」

至於今次會唔會同建制派協調呢？佢就拋下一句「自己嘅事自己決定」，之後就轉身入會議廳繼續開會喇。