氣溫似過山車 溫暖過聖誕 下周跌至12℃
[2016.12.23] 發表
【明報專訊】踏入12月，香港已入冬，但呢幾日氣溫仍高企，噚日天文台最高錄得24.8℃，有如置身初夏。天文台9日天氣預報顯示，下周三、四氣溫跌回12℃，天文台解釋，一股強烈東北季候風會喺下周中期影響華南；地下天文台進一步分析，𠵱家仲喺菲律賓東南嘅熱帶風暴洛坦會喺下周初進入南海，可能同東北季候風產生共同效應，令香港風勢增強，天氣顯著轉冷。
天文台預料未來幾日氣溫會似坐過山車咁，東北季候風會於今明兩日為廣東沿岸帶來較涼天氣，今日氣溫最低17℃，隨住季候風緩和，聖誕節氣溫回升，拆禮物日最高有24℃；一股強烈東北季候風下周中期影響華南沿岸，令香港氣溫急降，下周三、四跌至最低12℃，最高16℃。
天文台預料，熱帶風暴洛坦下星期初會闖入南海，有可能入埋本港800公里範圍，但預料受到東北季候風影響，洛坦到時會減弱，直接天氣影響預料非常小。地下地文台嘅《氣象人語》噚日發表最新文章，話西太平洋一年四季都可能有熱帶氣旋形成，但冬季形成嘅熱帶氣旋一般只會影響菲律賓同越南南部，一旦移向較高緯度時會受冷空氣影響，減弱為低壓區或轉化成溫帶氣旋。
更多港聞
相關新聞
