香港起飛機師下年出書講發夢

[2016.12.16] 發表

【明報專訊】民航機師鄭楚衡(Hank)花咗8年時間，同佢嘅團隊親手裝嵌小型飛機B-KOO「香港起飛」嘅故事感動唔少港人，Hank上個月完成環球之旅後，無去過睇架飛機，專注多陪屋企人，仲話下一個大計係出書講自己「發夢」嘅經歷。

2008年，Hank決定要砌一架小型飛機，佢當時發過信畀好多間學校，只有聖保祿學校校長黃金蓮修女一口答應，借場地畀Hank砌飛機。Hank話，雖然過程中花咗唔少時間教學生用工具、航空嘅基本知識，「都算為咗呢個飛行計劃添上另一層意義，希望用自己嘅故事影響更多人」。

香港商用航空中心周二舉行咗晚宴，邀請多個團體、學生到場聽Hank分享「追夢」經歷。有幾個幫手砌過「香港起飛」嘅聖保祿學校女學生都有出席活動，當中讀緊法律嘅Kelly話，以前好少掂工具，遑論電鑽呢啲較大件工具，所以首次砌機翼時都覺得好新奇，仲培養咗對飛機嘅興趣。

「香港起飛」一直存放喺機場禁區，Hank話希望為飛機搞展覽。咁未來有咩大計？Hank同太太異口同聲話希望將重心放喺家庭，多花時間陪一對仔女，「因為已經花咗太多時間喺飛機上，錯過咗小朋友成長時光」。但佢透露計劃明年書展出書，分享78日環球經歷，有興趣嘅朋友留意喇。

更多港聞