【明報專訊】海洋公園舊年蝕出血，但嚟緊嘅聖誕活動依然揼本，設計集視覺幻象、魔術、雜技同舞蹈嘅「超時空魔幻匯演」，曾經入選《全澳一叮》總決賽嘅幻影大師Michael Boyd將會喺壓軸表演中，被機械蠍子活活「鋸開」；同樣入圍總決賽嘅Soul Mystique仲會邊跳拉丁舞，邊表演極速變裝絕技，換足十幾套衫㗎。至於著名魔術師Cassandra Gasser就會「玩火」，同助手上演火籠逃脫、憑空現身。

匯演由今個星期六(17日)至明年2月，每日演4至5場。睇完刺激表演，仲可以喺海洋公園度過特別嘅平安夜或除夕夜。「海洋公園神秘深海之夜——聖誕版」安排參加者喺海龍王餐廳或者大熊貓餐廳食晚餐，再喺「海洋奇觀」展館通宵紮營，觀賞夜間海洋世界。

海洋公園行政總裁李繩宗話，公園入場人次跌幅逐步收窄，期望港鐵南港島線(東段)月底開通之後，將會有更多本地客同自由行旅客，到時可能要增聘人手應付。雖然嚟緊會加價，但李繩宗就覺得海洋公園同鄰近地區同樣規模嘅主題公園比較，仍算非常抵玩，未來除咗繼續加強喺南中國地區做「短途假期」推廣，亦會繼續開拓韓國、印度同東南亞旅客市場。