【明報專訊】近年唔少年輕人鍾意去working holiday，政府噚日宣布多一個國家可以有呢個計劃，就係匈牙利喇！有關安排明年7月1日起生效，雙方青年人可以申請工作假期簽證，喺匈牙利或香港逗留最多12個月，參加者可工作以掙取旅費或修讀自資課程，雙方每年將各有200個名額。申請人年齡須介乎18至30歲。

負責同匈牙利簽訂協議嘅係勞工及福利局長張建宗，佢話匈牙利係香港第11個雙邊工作假期計劃伙伴及首個一帶一路沿線伙伴國家。自2001年起，香港已先後與新西蘭、澳洲、愛爾蘭、德國、日本、加拿大、韓國、法國、英國及奥地利簽訂同樣計劃，至今已有超過7.5萬名香港青年參與計劃。有興趣可以瀏覽入境處網頁(www.immd.gov.hk)。